Uncl Yakult

呢幾日打颱風，個颱風個名叫做『樺加沙』，聽講好犀利，好多地方都經已停工停課，今日做完gym大概十點𡃁鐘，去到街市，發現好多嘢都俾人沽空，往日呢個時候，啲豬肉檔都仲有好多豬肉賣，今日想慢慢揀都難，根本冇得你揀，好多檔口個老細經已䟴䟴腳，我都買咗啲豬肉，同馬蹄，仲有芫茜，諗住包餃子留返聽日樺加沙正式吹襲嘅時候食，因為聽日可能橫風橫雨，出唔到街。不過此刻我寫緊日記，出面得幾滴雨，但重頭戲應該係凌晨嘅時候。 身邊都好人都笑打風啫，又唔係打仗，唔明啲人狂掃物資為乜，我話呢個係疫情後遺症，可能係一種心理創傷嚟嘅，曾經因為驚封鎖控制，買唔到生活物資而惶惶不可終日。呢種恐怖已經深深咁係心中留下咗烙印。所有資訊都話俾你知，呢個颱風好L勁，勁到點，估唔到。所以大家都做好準備。再加上執輸行頭慘過敗家，人搶你唔搶，你就蝕底嘅心理暗示。所以一切都好似呢個颱風嘅威力咁crazy。就連我都唔擔心冇嘢食，但忍唔住走去街市，商場，睇下有乜嘢買，好似去一去，你個心會安穩一啲，明明個樣嘢我並唔需要。 因為打風，屋企附近嘅游泳中心停開。前幾日先做咗佢哋嘅年費會員（唔想去越秀公園嗰個游泳池喇，太遠，又多人）。噚日游水嗰陣，聽到有個爸爸同個仔仔講，做任何事都要有目的，你要知道自己喺度做緊乜，唔好為游而游。當其時我內心有啲啲複雜，我諗我細個嗰陣，我老竇好似冇點樣同我講過啲乜嘢人生大道理。如果我阿爸多啲教我做人，我會唔會往後嘅人生路會唔同啲呢。有啲羨慕呢個細路，有阿爸言傳身教。我望咗吓嗰個爸爸，好似總後生過我，我諗，如果我有細路，我又會同佢講啲乜呢。 希望個風快啲走啦，俾咗年費游水，唔想蝕俾佢。

上個星期日同小周周去咗澳門睇《鬼滅之刃》，雖然三弦嘅故事如佢所言，好無聊，但整體都係好好睇，熱淚盈眶，好想快啲睇大結局！ 睇完鬼滅，就順便玩番兩舖啦，其實早上已經係葡驚人玩過，輸咗四百，又贏番三百，即不過有舖癮，仲係覺得自己可以贏啲錢走。之後去咗美高梅，不過玩咗幾輪，輸完又贏，贏咗又輸，最尾淨番兩百蚊。但小周周仲係唔想走，覺得有機會翻盤，話玩埋佢啦。誰不知喺一部老虎機嗰度竟然撞手神，當螢幕嘅銀碼不斷喺到跳升嗰陣，覺得一齊都好夢幻，直到最後個銀碼去到5440幾蚊先停落嚟。咁大個人第一次賭錢贏到咁多，難怪咁多人過大海孤注一擲，實現人生反轉啦。有啲可能最後傾家蕩產，變成《鬼滅》入邊嘅鬼，或者人唔似人，鬼唔似鬼。 不過我哋都係見好就收，然之後就走佬番廣州啦。

噚日去咗化龍，主要係去想拍一怕隻石貓，冇諗到有人會拜貓，從曉港出發轉四號線到新造，喺月台等李老師，半個鐘之後就call滴滴，坐咗十幾分鐘車，終於去到沙亭財神廟，見到隻石貓喇。其實隻石貓好普通，冇乜特別。李老師話，唔可以當面叫佢做貓，要叫大王，唔係嘅話，佢會嬲豬㗎。既然一場嚟到，就順便拜拜大王，裝住香，大王大王保佑身體健康，賺多啲錢，屋企四隻貓都身體健康！保佑亞李老師都身體健康，李老師用隻眼啤住我，要我收聲。我阿嫲話，稟神要講出嚟㗎。 原來大王喺正月十六有誕辰，好多人嚟拜佢，噉我唯有出年正月十六再嚟過喇。 睇完石貓之後，我哋就去咗當地頗為知名嘅餐廳——腰記飯店。點咗個蠔油乾逼雞，蓮藕粉，蝦醬蒸𩶘魚。蠔油乾逼雞幾好食，佢啲雞應該係炸過，連啲骨都係脆卜卜，真係啱晒啲燒酒佬，蓮藕粉係將蓮藕剁成蓉並拌入蝦米豬肉碎，第一次食蓮藕粉，感覺幾新鮮。蝦醬聽講係自家製，唔係我平時食開嘅隻味，偏咸，不過都不過不失。兩個人盛惠213蚊。 落樓梯嘅時候，睇到場上竟然掛住香港播音皇帝李我嘅墨寶。特登走返轉頭，問啲飯店員工係咪真跡，佢話係呀，三十幾年嚟過。不過睇番落款，上面寫住「癸未年」，都係廿幾年前啫。冇諗到李我叔都嚟過。突然對呢間餐廳刮目相看。 之後仲去咗睇屈大均嘅墓、新造嘅糧倉，不一一記述了。