噚日去咗「執書」，正所謂：「執輸行頭慘過敗家」，但今次如果「執書」遲咗就真係敗家喇。K姐所在嘅機構接收咗一個老人家嘅舊書，佢九十幾歲，2013年嗰陣過身嘅，剩落多達三千本藏書喺屋企嘅二樓。佢個仔都六十幾歲，話啲書唔啱睇，賣俾收買佬又覺得可惜，唯有捐俾公共機構。 K姐話佢哋麻麻哋想接收呢啲書，主要上架太麻煩，而且好多書未必啱佢哋嘅受眾睇，所以就叫咗我哋幾個鍾意睇書嘅朋友一齊嚟執啲書走。 其實我幾鍾意整理人哋嘅舊物。因為可以通過一啲舊物可以了解一個人嘅喜好，佢嘅過往。呢個老人家嘅愛好好多，佢應該好鍾意攝影，因為佢有大量嘅攝影書籍。不過今次執書導致我有一個後遺症，就係好似對書冇乜執念，甚至想清走屋企部份嘅書，以前要揼一啲書係一個好艱難嘅決定。最先放棄嘅係讀書時期嘅課本，細個想要零用錢，當然係要對啲課本落手喇，賣俾收買佬。後來自己出嚟賺錢買嘅書就唔捨得揼，不過都有例外，就係郭敬明嘅書。
博文
目前显示的是 四月, 2026的博文