Uncl Yakult

噚日同李老師去永利食冬瓜盅，麻麻地啦。 唔知係咪年紀大咗（雖然我家陣37歲，仲未去到七老八十），味蕾退化，定係話家陣啲廚師唔掂，好似好難食到好食嘅嘢，乜都覺得麻麻地，味道麻麻地，賣相麻麻地，環境麻麻地，但價錢就唔麻麻地喇，今次一個冬瓜盅盛惠188人仔，食唔出有乜特別。 食完之後就由沿江路往東行，經江灣橋去市二宮，途經以前我師傅嘅屋企同佢前夫嘅公司樓下。李老師講起佢老竇喺沙灣曾經開廠，係一間做零食嘅公司，規模唔算大，但因為後嚟俾人呃咗十幾萬嘅貨款（喺大陸90年代十幾萬係巨款喇，嗰陣我老竇份糧先得五百幾六百蚊。）自此家道中落。唔係嘅話家陣已經係太子爺喇。 佢老竇間公司叫田園食品有限公司。我話，以後有錢喺沙灣開返間cafe，叫田園cafe，彌補番你老竇當年創業失敗嘅遺憾。李老師話唔好喇，唔會有人去㗎，家陣啲人淨係買9個9咖啡。好似又有道理。 今晚我又勸李老師揾番份工，因為聽佢講，積蓄經已所剩無幾，最近佢屋企隻貓跌斷腳。使咗成五千幾蚊。聽到都覺得揦脷。李老師話，每次當我叫佢揾工，佢都覺得我好陌生，話我一啲都唔了解佢。講心嗰句，其實我又真係唔了解佢，雖然我哋已經識咗十幾年。我始終都係擔心佢，但又無能力幫佢，所以就口痕講下，不過，有時候講出嚟嘅話「好輕」，但對於聽嘅人嚟講就「好重」。 李老師一直在摸索緊自己嘅方向，我同樣都喺度摸索緊，前路係點嘅呢，唯有見步行步。

呢排好早就醒，通常諗太多就會瞓得唔好，但又冇辦法控制自己唔諗嘢wor，人類真係煩。 尋日晏晝三點去咗中山八周門葉氏推拿按摩，嗰度嘅師傅清一色都係有視力障礙，今日同我按摩嘅一個盲人師傅睇落好後生，但力度好足，今日啲肌肉赤赤痛。我思疑佢係咪按傷咗我啲肌肉。 每次喺嗰度按摩，聽得最多嘅係啲盲人師傅講「食乜嘢」，可能食嘢係佢哋一日最快樂嘅事。睇唔到呢個世界，但仍然可以通過味蕾去體驗人世間嘅甜酸苦辣，都算係不幸中嘅大幸。

呢段時間唔知點解，突然好想寫番blog（始終都係處理文字冇太大嘅壓力），好想紀錄一下自己嘅日常or心情，唔想寫喺朋友圈，畢竟嗰度有太多唔熟嘅熟人。 今日早上去咗越秀游泳場游水，落住細雨游水嘅感覺好唔同，雖然個天好陰沉，水有啲清冷，但好舒服，有一種令人清醒嘅感覺。喺池底望上去，雨水點點，好靚。如果每次游水都落住細雨，都幾好㗎，一嚟唔會太曬，二嚟個場會少人好多，唔會游下游下有個阿叔喺前便阻住你，不過我都會有咁嘅一日，哈哈哈。