Uncl Yakult

  前晚包紫菜粟米餃，洗紫菜嗰陣，突然諗起細個第一次食紫菜，應該係小學嘅時候，就係去同學仔屋企玩，見佢一家人喺度食晏，台上有一大碗黑鼆鼆嘅嘢，但望落又好似好好食，後嚟先知道係紫菜。然後返到屋企就同阿媽講，我都想食紫菜。 阿媽後嚟真係買咗紫菜返嚟滾湯，第一次見到紫菜浸出嚟嘅水係紅色，阿媽仲好擔心係咪加咗色素，佢話：你睇下，啲紫菜咁嘅色！」當然為食嘅我根本就唔在意。阿媽滾紫菜湯，會加瘦肉，粟米，同鹹蛋，先燒紅隻鑊，然後落油，放薑片，然後加水，水滾之後，就落紫菜，粟米，再等水滾之後，落瘦肉，最後落鹹蛋，然之後加啲鹽。阿媽總會用隻壳裝少少俾我試味，我話差唔多就大功吿成。弊喇，寫寫下都有啲想流口水。 之後我自己出嚟住，都會時不時煮下，當然冇阿媽煮得咁好食啦。突然間又有啲掛住佢喇。

我自細就好鍾意種嘢，但係就冇心機打理。種親乜都死，我直頭覺得照顧植物難過照顧人或者寵物。寵物可能餓佢幾日，佢都未死，但有啲植物少淋水一日都會謝。 特登喺鄉下掘咗樖蕨，當時阿嫲幫我掘嘅，可能阿嫲都唔知我掘嚟做乜，鄉下隨處都係，賤過地底泥，以至於我都有錯覺，覺得呢啲蕨好粗生，唔使點打理，點知返嚟廣州，養咗幾個月，呢幾日忙住剪片，唔記得淋水，就枯死咗喇。前日見佢都好地地，噚日就經已乾晒。Damn it！ 其實我覺得如果識朋友好，伴侶好，最好都係揀啲鍾意種植物，而且打理得好好嘅人。因為佢哋夠細心，夠耐性，施肥除草換泥唔怕邋遢，我諗佢對待朋友亦如是。 我諗我以後都係唔種了。（可能過一排又會發姣發躉去種，哈哈哈）

有陣時喺網上睇到一啲資訊，或者喺生活中遇到一啲情景都會不期然令我諗起細個嘅事。今日喺微博睇到一個人分享咗一條醒獅比賽嘅片，我就突然諗起我亞爺好鍾意睇舞獅。 具體幾歲經已唔記得，亞爺同我行街，經過一間cd舖（好多年前），亞爺見到CD舖入邊嘅電視播緊舞獅嘅片段，亞爺竟然睇到唔捨得走，猛喺度話好睇堅持要睇多陣，後嚟索性行埋入去，買咗嗰隻舞獅嘅VCD。我當時剩係覺得好無聊，好想走，舞獅有乜嘢好睇啫，鄉下年年都有得舞㗎啦。 返到二叔屋企，阿爺就即刻播嚟睇，點知睇完第一節之後，後面嗰啲都唔係舞獅片，而係一啲公園風光片段，亞爺大呻揾笨柒，之後隻碟就冇點播過了。 雖然呢件事好細囈，但唔知點解就記到依家，大概係因為佢展現咗亞爺嘅興趣點，仲有一啲阿爺嘅回憶，以後再紀錄番先。