盲人按摩
呢排好早就醒，通常諗太多就會瞓得唔好，但又冇辦法控制自己唔諗嘢wor，人類真係煩。
尋日晏晝三點去咗中山八周門葉氏推拿按摩，嗰度嘅師傅清一色都係有視力障礙，今日同我按摩嘅一個盲人師傅睇落好後生，但力度好足，今日啲肌肉赤赤痛。我思疑佢係咪按傷咗我啲肌肉。
每次喺嗰度按摩，聽得最多嘅係啲盲人師傅講「食乜嘢」，可能食嘢係佢哋一日最快樂嘅事。睇唔到呢個世界，但仍然可以通過味蕾去體驗人世間嘅甜酸苦辣，都算係不幸中嘅大幸。
洗牙
唔經唔覺，原來到咗禮拜3，今日晚餐係食老麥，點咗個巨無霸套餐，經歷一段長時間冇食老麥，再食番薯條，發現麥當勞嘅薯條真係好好味，前提係新鮮炸出嚟嗰啲喎，當你將佢擺入口嘅嗰一刻，脷會先觸碰到佢嘅熱辣辣嘅温度，然後你立即用牙輕輕咬斷，瞬間就會感受都外脆內軟嘅薯條唧出嚟嘅油脂香味同埋恰都好處嘅鹽味。果然都係嗰句——少食多滋味。 其實我唔係想做老麥薯條食評，只係噚日洗完牙，今日想獎勵吓自己，雖然我成日都獎勵自己。 好耐冇洗牙，直到前排𠺘口嗰陣，啲牙齦經常出血，甚至連發夢都見到自己嘅牙差啲甩，我就知我係時候去洗牙喇。因為我有慢性牙周炎，醫生建議對牙齦做深層刮治，如果做過呢個手術嘅朋友都知唔係簡單清潔嗰種。 我一直唔願去洗牙，除咗想慳錢同埋覺得自己勤力啲刷牙就會冇問題之外，就係知道醫生會嗌我做呢個治療，因為幾年前我做過一次，我可以為會一勞永逸，做完以後都唔使做，點知係一廂情願。做之前會先喺呢嘅牙肉上邊打麻醉針，然後佢會用刮治器深入你嘅牙齦入邊，逐隻牙逐隻牙噉刮走嗰啲攝喺裏面嘅牙石。就算打咗麻醉針，有啲位可能牙石太難刮，又或者未完全麻醉晒，所以都會痛到攞命。而且每次只能做一邊牙，即係我要經歷兩次呢總折磨，好在我去嘅嗰間醫院，啲醫生都好細心同埋有耐性，但呢個過程都唔係咁好受，每次做完都會有一種俾人強姦完嘅感覺，全身無力咁攤喺度，眼角會不自覺咁眼淚。所以你唔想經歷呢啲痛苦，都係要注意口腔衞生。 打麻醉針嗰陣，有啲麻醉藥順住啲牙罅流入我嘅口腔，我瞬間感受到佢嘅苦味，我突然諗係細個換牙嗰時，阿媽帶我去睇牙嘅經歷。讀大班嗰陣開始換牙，門牙未甩，就經已有牙仔飆出嚟，阿媽好擔心噉樣嘅情況以後會變成倒及牙，因為怕啲門牙頂住，啲新牙就往入邊生。你知唔知乜嘢叫——倒及牙，即係你棚牙在完全咬合時，下顎嘅牙比上顎嘅牙較為突出，甚至蓋過上排啲牙，會冇咁好睇囉。我阿媽佢成日讚自己，好在我帶你睇牙醫咋，唔係嘅話就變到好似二叔噉倒及牙。我諗咗吓，好似喺我成長過程中，阿媽最關心我嘅好似都唔係乜嘢品行操守學業成績，而係我啲牙生得齊唔齊。 我第一次睇嘅個間牙科診所喺正幼稚園隔離，而呢個牙醫係我讀大班嘅老師推薦嘅，剝牙嘅過程唔係好記得喇，淨係記得好貴，阿媽成日話早知去醫院喇，醫院平好多，同樣嘅價錢可以剝幾隻啦。呢間診所嘅牙醫後嚟成為咗我呢個大班老師嘅老爺。當然，嗰陣佢已經同牙醫個仔拍緊拖喇，有一個畫面印象好深刻，就係我...
评论
发表评论