媽子粟米紫菜瘦肉湯

 前晚包紫菜粟米餃，洗紫菜嗰陣，突然諗起細個第一次食紫菜，應該係小學嘅時候，就係去同學仔屋企玩，見佢一家人喺度食晏，台上有一大碗黑鼆鼆嘅嘢，但望落又好似好好食，後嚟先知道係紫菜。然後返到屋企就同阿媽講，我都想食紫菜。

阿媽後嚟真係買咗紫菜返嚟滾湯，第一次見到紫菜浸出嚟嘅水係紅色，阿媽仲好擔心係咪加咗色素，佢話：你睇下，啲紫菜咁嘅色！」當然為食嘅我根本就唔在意。阿媽滾紫菜湯，會加瘦肉，粟米，同鹹蛋，先燒紅隻鑊，然後落油，放薑片，然後加水，水滾之後，就落紫菜，粟米，再等水滾之後，落瘦肉，最後落鹹蛋，然之後加啲鹽。阿媽總會用隻壳裝少少俾我試味，我話差唔多就大功吿成。弊喇，寫寫下都有啲想流口水。

之後我自己出嚟住，都會時不時煮下，當然冇阿媽煮得咁好食啦。突然間又有啲掛住佢喇。