去白雲山拍啲嘢

今日特登去白雲山拍啲嘢，係應元路坐旅遊1巴士，呢部巴士係我以前返工必搭嘅交通工具，佢會直達白雲山腳，我做嘢嘅個間公司就喺正白雲山正門隔籬。

一上車，發現係清一色嘅老人家，得我一個要用羊城通俾錢，霎時我有一種自己喺度獨力支撐廣州巴士嘅感覺。一如以往，呢架車都係行得好慢，好慢，每次遲到都係因為佢，坐咗差唔多二十分鐘先到。

落車後發現上白雲山正門嘅嗰段路變咗好多，搞咗好多花臣，左手多咗個乜嘢雲蘿植物公園，右手原先嘅農貿小市集冇咗變成咗綠地，而白雲山正門門頭整咗個華而不實嘅銀色傘狀大門。最估唔到嘅係，我曾經做嘢嘅地方竟然拆埋，變成咗一間mall，入邊有星巴克，有老麥，有點都德，同埋一啲不知名嘅餐廳。

當然，佢以前本身就係一間餐廳，懶唔高檔噉，後嚟做唔掂摺埋，我嘅前東家就用好平嘅租金租咗落嚟開咗間傳播文化類嘅公司。以至於我每次返工都有一種要去餐廳做地哩嘅感覺。

不過，其實我份工的確好似一個地哩。我老細想要一份點樣嘅招商文案，我就負責執俾佢。

我老細係2021年嗰陣因為癌症過身，先至48歲，佢無兒無女，佢係做雜誌廣吿代理起家嘅，紙媒好景嗰陣，真係唔憂冇廣吿，啲錢多到送上門，有啲cheap嘅廣吿就算多多錢都唔接。所以嗰陣食正呢條水嘅人都基本都發晒達。而我老細就係其中一位。喺東山水暖有兩間過百方嘅屋打通咗自己一個人住，風涼水冷，仲養咗隻雀仔㖭，睇佢住得噉好，就知當年紙媒有幾噉風光。

我去過佢屋企幾次，每次都係ot寫文案，佢係隔籬監工。其實佢份人好奄尖好難相處，發脾氣嗰陣成個女王噉，個個都要聽佢支笛。佢話以前佢啲下屬都好怕佢，佢着住皮鞋確確聲走入辦公室嗰陣，大家氣都唔敢唞。

當然佢有小聰明識計數同待人接物嘅技巧，但畢竟冇點讀過書，所以好多時候都俾唔到啲實質性嘅意見你，剩係識講「你明㗎喇」，其實我唔明，我唔知佢想點，改極都唔滿意，有時係排版唔好睇，有時係標點符號擺錯位，我記得真係好厭呢份工，我甚至好怕接佢電話，因為佢一打電話嚟，就係要改呢度改嗰度。以至於我家陣都唔鍾意接電話同埋靜音。

當時我離開電視台，賦閒在家，有日一個朋友話要介紹份筍工俾我，帶我識個人。然後就係見後嚟嘅呢個老細。佢話佢哋公司代理咗國外一個品牌，要請招商文案。其實我冇呢個工作經驗，但唔知點解，可能係熟人介紹嘅關係定佢哋好急住揾人用，我老細都係請咗我。不過佢後嚟成日同我講，按以前嘅標準，公司係唔會請你㗎，你要珍惜紜紜。後嚟我先知道、係因為間公司做唔掂，一直蝕緊錢，請唔起人，只能退而求其次，揾個識寫少少嘢嘅人頂住先。而我就係嗰個人。當然，其實我都做得好hea，我一心想做卜卜齋，所以成日交啲行貨過我老細，佢經常唔滿意，但又俾唔出一啲改進嘅建議，所以我諗佢都好谷氣。

有時候佢又好似會對你好好噉，佢會送啲佢唔用嘅名牌袋過你（但我唔鍾意），佢話你做乜嘢唔咩佢隻袋，佢又會煲啲花旗參雞湯你飲，我去英國旅行嗰陣，佢仲俾咗二百蚊美金嘅利是我。呢二百蚊我到家陣都未洗，一直放喺個錢罌度。後嚟公司有啲起色，賺到啲錢，佢都將佢份提成俾埋我，同我人工㖭。

公司後期大老細想求變，空降咗其他人嚟接管公司嘅業務，架空咗我老細，我老細當然唔忿氣，最後更加以有病為由唔返工。而我就成為咗一個磨心噉，夾係新舊上司之間，新上司要求寫嘅文案，我老細叫我hea做，最後我真係無心戀戰，同老細講，我想辭職。佢話，唔好，再等等。我都唔知點解要等等，有一種做多日都嫌長嘅感覺。後嚟過咗一兩個月，行政揾我，話會賠2+1我，同我解除合同。我當堂𦧲飯應。原來老細叫我等等係呢個意思。

嗰陣時我冇諗到佢係癌症復發，佢曾經有叫我去上海陪佢，但我婉拒了。直到我離職離開公司都冇見過佢。直到有同事同我講，tony走咗，你知道嗎。我才知佢在icu住了很久。

喪禮我有去，見到有幾個舊同事。但大老細冇嚟到。佢嘅姐夫個日笑笑口。其實我都知點解佢笑得出，因為我老細冇子女，佢啲身家都會留比兩個外甥。全場只有外甥女眼濕濕、因為佢舅父真係幫咗佢好多，包括供佢出國讀書。

寫咁多，唔係留戀呢份工，只係覺得短短數年，就發生咁多變化。睇嚟呢個係人生嘅常態。在往後嘅人生中，更加會越加頻密越加急劇，要練習嘅係如何坦然面對，坦然面對？